l مواضيع مدونة فتافيت

للدخول على المدونه اكتب في جوجل مدونة فتافيت على الرابط الاتي http://noormaya.blogspot.com/

اخبار العربيه

سيتم غلق المدونه قريبا للزوار سارع بالاشتراك فى المدونه قبل غلق الانضمام

الأربعاء، 21 ديسمبر، 2011

حسبنا الله ونعم الوكيل


اولا البنت اللي اتسحلت و قلعوها قدام العالم كلة واتلموا عليها وعدموها العافية
قالوا انها صايعه عشان نزلت من بيتها لابسة على اللحم
دة ادعاء كاااااذب لان في الفيديو دة شوفوا كوووووويس قلعوها البادي وكان لونة اسود
 
وقبل ما اي حد يكدبني شوفوا الفيديوا اهو

والبادي اتقلعلها وتقطع في ايد العسكري وحدفة بعيد
وبعدين واحدة لابسة بنطلون جينز تحت العباية طبيعي كدة مش هتلبس بادي؟؟؟؟؟
اذا كان قطعولها العباية والطرحة مش هيكونوا قطعولها البادي؟؟؟
طيب ولنفترض انها نازلة من بيتها بعباية عاللحم اية المششششششششكلة
واحدة وساترة نفسها فيها ايييييييية بقى تلبس زي ما تلبس ما وبعدين ماشي نازلة ولابسة عاللحم
دة يديهم الحق انهم يقلعوها ؟؟؟ دة في اهي عرف وشرع ودين؟؟؟
طيب عساكر وغلطوا حد يطلع يعتزر حد يطلع يقول هنحاكم فلان وفلان
حد يطلع يقول هذا فعل مشييييين لكن اكتفوا بابداء الاسف
ابداء؟؟؟؟؟!!!!!!! هو دة سعر لحمنا عندكم؟؟؟؟؟؟؟؟؟

ثانيا الشخص اللي غطاها وماسكين في شهامتة ورجولتة طيب يا سيدي شكرا
بس هما عروها بعد كدة ونطوا على دماغها
وبعدين اغمى عليها لية مكملين ضررررررررررررب ليييية اية الغل والحقد دة بجد كتير حرااااااام

ثالثا الست اللي كانت ماشية هي والراجل وراحوا يدافعوا عنها وسحلوهم برضة دول اية زنبهم
اللي كانت لابسة احمر والراجل لابس ابيض يتضربوا لية شوفوا الفيديو كويس هتلاقوهم ماشيين عادي
ولا واقفين للعساكر بطوب ولا اصلا ماسكين يافطة ولا معتصمين ولا حاجة يتضربوا لييييييية
والولد اللي سحبها وكان بيحاول انقاذها زنبة اية ياخد الضرب دة كلة بالعصيان والجزم على دماغة
طيييييييب لو كان غرضكم فض المظاهرة خلاااااااااااااااااص دول اغمى عليهم مكملين ضرب فيهم ليييييييييييييية؟؟؟؟؟؟؟؟؟؟؟؟؟؟؟

رابعا اللي بيتهم الثوار ان هما الي حرقوا المجمع العلمي نسيتوا الاتهامات اللي اتهموها للثوار ايام الثورة
اتهموهم هما اللي ولعوا في المجلس واللي سرقوا المتحف وطلعوا في الاخر شوية بلطجية وحرامية
طيب مش هما جابوا صورهم؟؟؟؟؟ ببساطة دول شوية بلطجية وخارجين عن القانون ما صدقوا لقوا زيطة ولمة
وحبوا يستغلوا الفرصة ويسرقوا وفعلا جابوهم وهما بيفكوا الحديد عشان يسرقوة
طيب هما الثوار اية اللي يخليهم يعملوا كدة اصلا ؟؟؟؟؟؟

خامسا اللي متفلحس اوي وعمال يقول الصور دي فوتوشوب نجيبلة صور واحد عينة رايحة يقولك فوتوشوب
نجيبلة واحد راسة مفتوحة فوتوشوب واحد ميت فوتوشوب طيب والفيديوهااااااااات قالك برضة فوتوشوب
بجد كمية جهل غير عادية الفيديوهات مفيهاش فوتوشوب ومفيش حاجة اسمها فيديو متركب
الفيديو بينفع يتشال منة حاجات ومناخدش بالنا ( ودة لو اتعمل في اكبر الشركات ) ولكن عمر الفيديو ما نقدر نزود فية حاجات
ومناخدش بالنا يعني هنجيب واحد نلبسة لبس جيش ونجيبة وهو بيضرب واحد و....... مش فاااااااهمة ولا مستوعبة اصلا
واللي بيقول كدة بيعبر عن جهلة والظلام اللي في دماغه


سادسا الاخوان والسلفيين يا حسرة قلوبكم يا بنات ياللي ادتولهم صوتكم عشان يحسنوا بلدكم
وعشان يجيبولكم حقوقكم وكمان عشان يستروكم
اهي اختكم اتعرت واتبهدلت ومحدش فيهم فكر يفتح بقة
كأن كان كل اللي هاممهم هو المجلس واخدوة وخلاص تولع البلد بعد كدة عاللي فيها
مشوفناش حد عمل مسيرة ولا انضم لوقفة للتنديد انة مهما عملت المرأة فمينفعش ابدا يقلعوها في الشارع ولا في اي حتة
تتعاقب تتحاكم لكن ولا تضرب ولا تتقلع ولا انتوا ليكم رأي تاني؟؟؟؟؟
وعلى فكرة انا ولا ضد الاخوان ولا السلفيين كأشخاص انا ضدهم كمؤسسات واحزاب
وكلامي موجة للاحزاب ( عشان مش بعيد يكفروني بعد الكلمتين دول مش غريبة عليهم )


سابعا اللي بيقولوا يا جماعه دي شكل متظاهرين ايوة دي شكل متظاهرين
ماهو دة نفس الكلام اللي قلتوة على متظاهرين يناير وهما نفس الناس اللي احتفلتوا معاهم بالثورة وبسقوط الريس
دول الناس ودول شكل شعبك
ونقلا عن الفيس بوك ((الناس دول معاهم صيع)) ... هز طولك وامشي امام أي مدرسة أو روح محطة القطر و شوف الناس شكلها ايه ...
دول شعبك منظر امه كده الفقر نحت في خلقته ...


ثامنا لو مش عارفين الناس دي بتتظاهر لية اسكت وثقف نفسك وبعدين اتكلم
الناس دي مش عايزة المشير وكانت نازلة من بيوتها عشان شافت ان كفاية علية كدة
وشافت انة ولا في فلوس رجعت ولا ناس اتحاكمت ولا حاجة حصلت
وحكومات جاية بزيطة وهوليلة كبيرة وفي الاخر يقولك اخبطوا راسكم في اقرب حيط
ومسؤلين مستفزين يطلعوا يقولوا دة اللي عندنا ولو مش عاجبكم تعالوا احكموا انتوا
طيب ما المشير طلع وقال لو مش عايزيني انا هعمل استفتاء ونمشي
طيب معملش كدة لية؟؟؟؟؟ لية قاصد يكره الناس في الثوار ويطلع منظرهم وحش
وماشي على نفس خطى الريس بالظببببببببط ومصمم عاللي في دماغة ومستغل الناس البسيطة
والناس اللي اتأثرت الفترة اللي فاتت وحست بالزنب تجاه مبارك فقالت تعوضة في المشير


تاسعا لو انت او انتي شايفة ان الثوار دول مش ثوار وبلطجية براحتك لكن مش شايف ان احنا قمنا بالثورة عشان الظلم؟؟
طيب حتى لو هما كدة مش برضة همنا بالثورة عشان العنف ضد المتظاهرين وضد المتهمين ( وان المتهم برئ حتى تثبت ادانتة )
منين جبت حضرتك الفكرة انك تحلل وتحكم عالناس دي وكمان تتحاكم من وجهه نظرك؟؟؟؟؟؟
هو انت لسة مش شايف انة مينفعش باي حال من الاحوال ان يبقى في عنف ضد اي حد؟؟؟؟؟
مش شايف ان مينفعش ان يبقى في عنف ضد المتظاهرين خصوصا
مينفعش يبقى نازل يفض مظاهرة اصلا الكلمة دي غلط نازل يحمي المظاهرة ايوة دة المفروض
يحميها من الرأي الاخر
لكن دة واحد نازل ومعاه اوامر بالضرب وفي ايدة خرطوش وطبنجة ورصاص حي دة نازل يقتل مش يحمي

عاشرا العساكر اللي ولعوا في ميدان التحرير والمستشفيات الميدانية لية محدش قال عنهم نص كلمة؟؟؟
وقبل ما اي حد يكدبني شوفوا الفيديوا اهو


لو الفيديو مفتحش اعملوا سيرش عاليوتيوب بعنوان انتهاكات المجلس العسكري وشوفوا بعنيكم

واخيرا انا احب اقول لكل واحد او واحدة شايفة ان المتظاهرين دول بلطجية وبيعملوا قنابل ملوتوف
ايوة بيعملوا قنابل ملوتوف جرب كدة تبقى واقف تتظاهر ويقع جمبك شاب زي الورد
ويروحوا يسعفوه وتسمع البقاء لله
جرب تبقى واقف في امان الله وتلاقي خرطوش في عين اللي جمبك صفهالة وشوف رد فعلك هيكون اية
شوف رد فعلك وواحدة لا حول لها ولا قوة بتتعرى بالطريقة البشعه دي دة لو انت فعلا بتفهم
ان مكنتش تاخد اقرب حاجة وتجري بيها عليهم يبقى ليك الكلام
وهو دة اللي هما قاصدينة بيستفزوا المتظاهرين عشان المتظاهرين يخرجوا عن شعورهم ويصوروا الكلام دة ويوروة للناس
مش قادرين يفهموا ان مهما حاولوا ميخلوش المتظاهرين تسجل اللي بيعملوا مش هيقدروا
دول مسكوا صحفية وسحلوها وكسرولها الكاميرا وسخرية القدر الصحفية دي اصلا مع المجلس والعساكر وجاية تصور البلطجية

على فكرة لندن ولعت من كام شهر لمدة 3 ايام محدش في اللي ولعوها ماااااااات
ومش والعه في مظاهرة ولا في مطالبة بحقوق لااااااااا دي والعه في سرقه
الحرامية والعصابات طلعوا على المحلات والبيوت والمولات ولعوا فيهم وسرقوهم
ومحدش منهم ماااااااات وكانوا بيناشدوا الحكومة تلحقهم وتفتح عليهم النار
الوزير قال اسف انا هستخدم خراطيش المياه دلوقتي وانا كفيل اني اوقفهم بدون نقطة دم واحدة
الجيش بتاعنا طلع وقال انا اتعهد بتأمين الممتلكات
طب و الارواح؟؟؟؟؟ طب والاجساااااد؟؟؟؟
يعني معنى كلامك ان الراجل والست والبنت اللي اتسحلوا ان اكيد بيتهم في امان
طيب ماهما خلاص ضاعوا واتبهدلوا
تفسر بأية يا مجلس يا عسكري الفيديوهات اللي انتشرت للجنود وهما بيكسروا في العربيات؟؟؟؟
وكان في الميدان
ومكانتش صور ( عشان محدش يقول متفبركة ) دي كانت فيديوهات
اية كمية الغل دي جت منين؟؟؟؟؟؟؟؟
هي دي الامانة يا جيشنا ؟؟؟؟؟ دة احنا كنا بنتفاخر بيكم وتمشوا من جمبنا نتباهى بيكم
دلوقتي انا بنام بسببكم 4 ساعات في اليوم
وببكي قدهم
ومكتئبة وحاسة بعدم امان وخيانة
لية دة كلللللللللللللللللللة
مش عارفه لية حاسة ان اللي بيحصل في سوريا هو اللي قواهم علينا
لكن لية هما مش خايفين عالبلد؟؟؟؟؟
ومش فاهمين ان كل ما زاد عدد القتلى كل ما زاد عدد المؤيدين للمتظاهرين؟؟؟
لية مصممين يقروا من نفس كتاب مبارك؟؟؟
تعبت بجد تعبت وقرفت
دمنا رخيص ولحمنا كمان بقى رخيص
تعبت اكتر من الناس اللي مش فاهمة
وتعبت اوي من الناس اللي فاكرة نفسها فاهمة وعمالين يشتموا ويسخطوا على المتظاهرين
طب قولوا احنا بنسخط عالبلطجية لكن متقولش ابدا ان المتظاهرين هما البلطجية

حزينة عليكي اوي يا مصر
حطناكي امانة في رقبة ناس خاينين للامانة
عمري ما شفتك سودا اوي كدة يا بلدي

ليست هناك تعليقات:

إرسال تعليق

احدت التدوينات

شات مدونه